Monsoon Skin Infections : पावसाळ्यात वाढत्या आर्द्रतेमुळे संसर्ग निर्माण करणारे जिवाणू आणि जंतूंचीही झपाट्याने वाढ होते. या ऋतूमध्ये त्वचेच्या विकारांचा सर्वात मोठा धोका असतो. चेहऱ्यापासून मानेपर्यंत आणि शरीराच्या इतर भागांवर त्वचेवर खाज सुटणे, लाल पुरळ, लहान मुरुम यासारख्या समस्या दिसतात. याशिवाय आर्द्रतेमुळे शूज घालणे आणि पावसाच्या पाण्यात पाय ठेवल्याने पायाला संसर्ग होऊ शकतो, ज्याला बुरशीजन्य संसर्ग म्हणातात. (Follow these tips to avoid getting skin infection in monsoon)
पावसाळ्यात बहुतांश ठिकाणी पाणी साचते, अशा परिस्थितीत घाण पाण्याच्या संपर्कात आल्याने त्वचेशी संबंधित समस्या तुम्हाला अडचणीत आणू शकतात. छंद म्हणून जे लोक आपले पाय थंड पावसाच्या पाण्यात जास्त काळ भिजवून ठेवतात त्यांना बुरशीजन्य संसर्ग होण्याची शक्यता जास्त असते. यामुळे पायांच्या त्वचेत खाज सुटणे, लालसरपणा किंवा गंभीर संसर्ग यासारख्या समस्या उद्भवू शकतात. त्यामुळेच पावसाळ्यात त्वचेची विशेष काळजी घेणे आवश्यक आहे. पावसाळ्यात त्वचेची काळजी घेण्याबाबत काही टिप्स आपण जाणून घेवूया.
पावसाळ्यात त्वचेशी संबंधित समस्या कशा टाळाव्यात
घरामध्ये एलर्जीची झाडे ठेवू नका
घराच्या आत कुंड्यांमध्ये ऍलर्जीक वनस्पती ठेवू नका, कारण या ऋतूमध्ये त्यांच्यामध्ये हानिकारक जंतू वाढू लागतात, त्यांच्या संपर्कामुळे ऍलर्जी होऊ शकते. विशेषत: यामुळे त्वचेची जळजळ आणि संसर्ग होण्याचा धोका वाढतो. पावसाळ्यात सर्व कुंड्या बाल्कनीत किंवा बागेत ठेवा.
पाळीव प्राण्यांच्या स्वच्छतेकडे विशेष लक्ष द्या
या ऋतूमध्ये जंतू तुमच्या पाळीव प्राण्यांच्या शरीरावरही आपला वावर करतात, अशा परिस्थितीत त्यांच्या संपर्कात आल्याने त्वचेला संसर्ग होण्याचा धोका असतो. यादरम्यान त्यांच्या स्वच्छतेकडे विशेष लक्ष द्यावे. त्यांना नियमित आंघोळ घाला आणि त्यांना बाहेर फिरायला न्या जेणेकरून ते इकडे-तिकडे घरात घाण करणार नाहीत.
सैल कपडे घाला
पावसाळ्यात हलके आणि सैल कपडे घालावेत. तसेच, कपडे पूर्णपणे कोरडे करण्यास विसरू नका. पावसाळ्यात वातावरणात ओलावा असतो, तसेच सूर्यप्रकाशाअभावी कपडे पूर्णपणे सुकत नाहीत. अशा परिस्थितीत, त्यांच्यामध्ये जंतू वाढू लागतात आणि त्वचेवर पुरळ आणि खाज येण्याचा धोका वाढतो.
आंघोळीनंतर आपले शरीर पूर्णपणे कोरडे करा
पावसात अंग पूर्णपणे कोरडे झाल्याशिवाय कपडे घालू नका. असे केल्याने तुमच्या शरीरावर आर्द्रता टिकून राहते, तसेच कपड्यांवर ओलावा येतो, त्यामुळे शरीरावर लाल पुरळ उठू लागतात आणि खाज-जळजळ होण्याची समस्या निर्माण होते. म्हणून, सर्वप्रथम मऊ टॉवेलने शरीर कोरडे करा आणि त्यानंतरच कपडे घाला.
शॉवरनंतर लाइट मॉइश्चरायझिंग क्रीम लावा
जर तुम्ही ऑयली मॉइश्चरायझर वापरत असाल तर पावसाळ्यात आंघोळीनंतर नेहमी वॉटरबेस मॉइश्चरायझर वापरा. ते तुमच्या त्वचेवर ओलावा निर्माण होऊ देत नाही. याशिवाय अँटी बॅक्टेरियल आणि अँटी फंगल मॉइश्चरायझर बाजारात उपलब्ध आहेत त्याचा वापर करा.
प्रतिकारशक्तीची काळजी घ्या
पावसाळ्यात विविध प्रकारच्या संसर्गाचा धोका वाढतो. या काळात सर्व हानिकारक जंतू तुमच्यावर वर्चस्व गाजवायला तयार असतात. त्यांच्याशी लढण्यासाठी आपले शरीर तयार करणे खूप महत्वाचे आहे. यासाठी डॉक्टर निरोगी संतुलित आहाराची शिफारस करतात. रोगप्रतिकारक शक्ती वाढवणारे असे अनेक पदार्थ आहेत जे पावसाळ्यात खाणे आवश्यक आहे.
पावसात शूज घालणे टाळा
पावसाळ्यात पायात जास्त ओलावा निर्माण होतो, याशिवाय, अवेळी पाऊस पडू शकतो, त्यामुळे शक्यतो बंद पायाचे शूज टाळा. उघड्या सँडल आणि चप्पल घाला जेणेकरून हवा त्यातून जाऊ शकेल. बंद शूज बोटांमध्ये बुरशीजन्य संसर्गाचा धोका वाढवतात.
पायाची नखे स्वच्छ ठेवा
या ऋतूमध्ये पायांची नखे नियमित कापली पाहिजेत, त्यात अडकलेल्या घाणीमुळे संसर्ग होऊ शकतो. या ऋतूमध्ये जंतू अधिक सक्रिय होतात त्यामुळे संसर्गाचा धोका वाढतो.
त्वचेला खाज सुटली असेल किंवा पुरळ उठत असेल तर ताबडतोब त्वचारोग तज्ज्ञांचा सल्ला घ्या. डॉक्टरांच्या सल्ल्याशिवाय कोणतेही घरगुती उपचार किंवा ओव्हर-द-काउंटर क्रीम लागू करणे टाळा. कारण अनेक क्रीममध्ये ‘स्टिरॉइड्स’ असतात ज्यामुळे त्वचेच्या समस्या वाढू शकतात. पावसाळ्यात त्वचेच्या समस्या असल्यास डॉक्टरांच्या सल्ल्याशिवाय कोणतेही औषध घेऊ नका.
